Lêgë tî fahngo sahngo na dambetti

Tenne tî fahngo sahngo na dambetti ayeke mbênî kpalle sô, âdutï ngbiii, lê nî ayeke zîngo töngana lê tî ngbêre kä. Âkotta âwahihngango-mbetti tî koddoro ndê ndê atene tenne nî fânî mîngi atene : môlengê alîngbi tî mâi nzönî na yâ tî li tî lo gï töngana lo manda yê na yângâ sô lo yeke tene ka lâkwê na da.

Ayeke taâ tenne, na mbâgë tî âmôlengê, sï ayeke ngâ taâ tenne na mbâgë tî âkotta zo ngâ. Koddoro alîngbi tî maî hîo na nzönî nî kwê pëpe töngana âzo tî yâ nî alîngbi tî manda yê tî gîgî na yângâ tî koddoro nî pëpe. Zo alîngbi tî manda finî kodë tî fahngo-yakka tîtene alë mîngi ahön tî kôzo, wala finî kodë tî battango-nyama wala tî sarrango-da töngana nye sî töngana lo du tî manda farânzi kôzo nî kwê awe sï lo gä tî manda âyê sô kwê na pekô nî ?

Ndâli tî âkotta zo, ndâli tî âmôlengê, ndâli tî âWabêafrîka kwê, ayeke taâ mbîrrimbiri kua tî koddoro laâ tî fa sahngo na dambetti. Na Bêafrîka, ayeke ngbêreyê ngû balë-ûse na okü fadësô laâ ândokua tî letäa ndê ndê ayeke tara tî fa sahngo na dambetti, atâa na âmôlengê, atâa na âkotta zo, me lâkwê, angbâ gï tarrango-nî. Âkotta zo tî koddoro nî âde agbû tenne nî na kate töngana mbênî kotta kpalle tî nzönî dutï tî halëzo pëpe, atâa sô âla lü gbâ tî ândya tî mâi na sahngo, asâra gbâ tî âbûngbi tî leke tenne nî. Âwakodëkua aleke lêgë nî kwê awe. Ayeke töngasô laâ ë hînga fadësô atene lêgë tî fahngo sahngo na yâ tî dambetti ayeke dandara, töngana letäa amû nginza tî sâra na âkua sô:

1) Kôzo nî kwê, suhngo bûku tî fahngo-mbetti na nî na sahngo tenne tî âmolongö tî âdambetti nî ôko ôko kwê,

2) Ûse nî, fahngo-sahngo na âwafahngo-mbetti, atâa âla sô ayeke sâra kua awe, atâa âla sô angbâ na likôlo tî gä âwafahngo-mbetti nî;

3) Gï na pekô tî âkua ûse sô laâ a lîngbi tî mû ndya tî zï lêgë tî fahngo sahngo na yâ tî âdambetti nî, lêgë-ôko na tî fahngo-yê na sahngo ngâ.

 

Kâmba