Mbï zî yângâ tî mbï tî tene tenne
Îtä tî mbï amä nî, amä nî amä yâ nî.
Sï mbênî lâ, wandê alohndo kâ
Asï na koddoro tî ë, afa na ë yângâ
Tî koddoro tî lo, sï ë kwê ë manda nî.
Fadësô mbî zï yângâ tî mbï tî tene tenne
Îtä tî mbï apûsu kâ, atene : sô nye laâ?!
Sô mbunzû atene : "c'est comme ci, c'est comme ça"
Lo mä tî lo atene "sokomsî sokomsâa"
Sï lo bâa lo tene nzönî yângâ nî laâ
Fadësô mbî zï yângâ tî mbï tî tene tenne
Îtä tî mbï amä nî, amä yâ nî gbakô
Lo hë ngyâ lo tene : sô yângâ tî zo laâ?
Yângâ tî mbï sô âgue na mbï na ndo wa?!
Gîgî tì fadësô âsï na mbï daä laâ ?!
Sahngo ayeke mâi, sahngo ayeke vunga
Fadë mbênî lâ yângâ tî ë agä yângâ
Tî zo, tî hînga yê na nî, tî dë mbetti na nî
Sï fadë âîtä kwê akîri amä nî, amä mî, amä yâ nî
Sô e zî yângâ tî ë tî tene sahngo.
Marcel Diki-Kidiri
Derêe
Sêngê derêe
Gï sêngê derêe na gbelê tî lo.
Vukö derêe sô avûko na mênë tî vukö zo
Vukö ndo sô avûko na vundü tî bê tî zo
Aluttiï
Ayo na nduzzu
Akpêngba
Akânga...
Nehngo têmë na lêgë tî dûnîa
Sô kotta-bê tî zo akânga daä.
Ngûnzapä ayuru daä
Abûngbi na mênë, vukö mênë
Na gbikï
Na ngûlê
Na ngonzo tî giriri na tî fadësô kwê
Asua na lê tî lo
Vukö zo
Vukö lê,
Kpehngba lê sô akpêngba töngana lê tî wâ
Ngbanga tî sô mênë asï daä mêkê
Kurru lê sô ahôle töngana gbôkkora
Ange,
Abâa ndo töngana baahngo-ndo tî kwâ
Na terê tî derêe sô:
Derêe tî wazibba
Derêe tî bûburû
Mo hînga tî mo ndo pëpe
Mo hînga tî mo tenne sô pëpe:
Zo kwê zo.
Na nduzzu yongôro
Kotta dû akôro
Vukö tênë tî derêe nî
Töngana ndäpêrrere na yâ tî vukö bï,
Afa pehmbe tî lo, pehmbe tî wên.
Lâ alï daä na nzï nî
Abi wâ tî lo na ndö tî zo nî
Angbâ gï töngasô ngbiii akîri;
Alîngbi tî sï kâ na lo pëpe.
Kâ, yongôro kâ... wala ndurü ge ?!
Bali ayeke sûku na poppo tî âsorro
Âzo ayeke tambûla na dohngo-ndâporro
Na ndö tî guduröon.
Âla yü patalöon
Âla 'ke kpë lorro, tî gue, tî gä,
Âla 'ke na kua mîngi.
"Takasïi..."
Kpûkpû na kpûrû atêngbi.
Gbâzâbängâ
"Pippiii... pippiii..."
"Krrr... krrr..."
"Ngêrêngö... ngêrêngö..."
"Lêgë, lêgë, lêgë..."
Mo lutti na lêgë ngbanga tî nye, Derêe!
Âkôlï, âwâlï, âkotta-zo, âmôlengê
Âkôndo, ângäsa, ângungu, âpûpûlenge
Âla kwê alîngbi tî tambûla, tî huru, tî fono
Na lêgë tî dûnîa, dûnîa
Dûnîa ayeke, dûnîa anzere.
Anzere gï kâ, yongôro kâ, na mbêngû tî derêe kwê.
Marcel Diki-Kidiri